Zeenesche Concert mat Musek vum Fauré, Biber, Glière a Kurtág
D'Bün ass prett fir de Concert. E Mikrofon an eng komesch magesch Pedall, eng sougenannt loop station, waarden op hiren Asaz. Zwou Musekerinne kommen op d'Bün. Zwou, déi op den éischte Bléck esou identesch schéngen: vun der Uniform iwwer d’Coiffure bis bei de Gesang, mat Ausnam vun den Instrumenter, well déi eng spillt Cello an déi aner Gei. Mee, wat op den éischte Bléck d’selwecht ausgesinn huet, bréngt no an no Ënnerscheeder mat sech. No turbulent-komeschem Gestëppels a Meenungsverschiddenheeten a mat Hëllef vun der Musek, bréngen déi zwee et fäerdeg, hir Ongläichheeten ze schätzen an de Concert harmonesch ofzeschléissen. Eng Performance, déi net nëmmen d’Diversitéit mat Humor feiert, mee och de jonke Publikum déi ofwiesslungsräich emotional Welt vun der Musek entdecke léisst.