© Dan Castiglia, Bettendorf
Stellt iech e Museker vir mat enger Sammlung vun Erfindungen: ferngesteiert Instrumenter, déi nëmme Musek spillen, wann de Knäppche gedréckt gëtt. Stellt iech elo och en Dänzer vir, dee muss waarde bis een de Knäppchen dréckt. Hie kann nämlech nëmmen danzen, wann d'Musek ufänkt ze spillen. Stellt iech elo d'Kanner vir, virun deenen eng Konsol mat grousse faarwege Knäppercher placéiert ass: et ass dach onméiglech ze widderstoen do dropzedrécken! Wat fir eng Freed, all déi verschidden Tasten ze testen an domat déi Erwuessen ze kontrolléieren. ImpulZ ass en interaktiven a spillereschen Danzspektakel, wou déi Allerklengsten d’Kontroll iwwer d'Musek an d’Choreografie iwwerhuelen an esou bei all Optrëtt hiert eegent eenzegaartegt Stéck kreéieren.