D'Routkäppchen vun de Bridder Grimm iwwer e jonkt Meedchen, dat fir d’éischt Kéier eleng an de grousse Bësch geet, wou hatt dem béise Wollef begéint, ass ouni Zweiwel een vun de bekanntste Märercher op der Welt. An der Versioun vum Traffik Theater entwéckelt sech d’Geschicht ronndërem eng Matroschka, déi russesch Holzpopp, aus der ëmmer méi Poppen an ënnerschiddlecher Gréisst erschéngen. Spannend a mat vill Charme erzielt vum Dan Tanson, a musikalesch ënnerstrach vum Celliste Michel Boulanger, andeems den ënner Asatz vu sengem ganze Kierper aus sengem Instrument all spannend zäitgenëssesch Klangfacetten erbäilackelt (Schnaarchen abegraff), entsteet e faszinéierend visuellt Musekspill fir Kanner: E Concert fir unzekucken, en Theaterstéck fir nozelauschteren!